Das Wucheend hemer üs fürd Capilano Bridge in North Vancouver entschiede. Am Afang vom Tag hets eso usgse as müstmer das ganze abblase, doch zu dem Ziitpunkt womer üs troffe hend, isch es plözli wunderschöns Wetter worde. Hemer wieder emal Glück ga...
D'Capilano Bridge isch en Brug über en Schlucht. I dere Schlucht hets na en chline Fluss. Die ganzi Brugg isch 137m lang, 70m über em Bode (aso überem Fluss) und sie chan 90'000 kg träge. Es isch aber nöd en normali Brug wie die über d'Linth sondern es isch en Hängebrug und die schwanket die ganzi ziit wemer drufstaht. Aso wenn es paar Lüüt uf ei Siite gange sind, het mer das am anderi Endi vo de Brug gmerkt... (Es het sich öbe so agfült als wer mer bsoffe, aso hend die andere gseit, ich bin ja na nie gsii... :-D).
Nebet de Brug hets na en chline Park mit chlinere Hängebrugene zwüschet Bäum. Dur en Teil vom Wald hets au na Holzbrugene und Weg womer s ganze nachli chan go aluege. Aber s'einzige Tierli womer gse hend isch es squirrel (Eichhörnchen) gsi.. Aso nüt neus, die chamer au in Arosa ufem Eichhörnchen-Weg go beguetachte und füetere...
Das wers wieder emal gsi für die Wuche... Nächscht wuche wirds wahrschindli nöd eso viil Posts gä will es die ganzi Wuche regne sött.... De Plan fürs nächschte Wucheend isch aber en Trip nach Whistler....
Demfall möchets guet und en gueti Ziit!
Howdy Dario!
AntwortenLöschenUhuuu, s'isch wiä wäni Föteli vo Dihei aluägä - s'chunnt mer soooo bekannt vor :) MEGA! Gasch au ämal no nach Victoria uf Vancouver Island? >empfehlenswertä Kontrast! §:)
Hoffä, s'gaht Dir guät? Minä 4-beiner und mir gahts prima - wänni nöd schaffä, simmer immer öpä unterwägs. Han gad Feriä diä nächst Wuchä, tuät guät ;)
Heb ä guäti Zyt & liäbi Grüäss
Nicole