Echli "Sightseeing"

He Hoi mitenand

Am Mittwuch isch es nach de Schuel plötzli na schön und endli mal echli heiss worde... So schön. Den han ich mich uf de weg gmacht um es paar föteli z'mache und die berüehmt berüchtig Steamclock go besichtige =).Bevor dasi aber die Uhr go aluege bin, han mi na uf de "Canada Place" gwagt ;-). Vo dete us hani beobachtet wie Wasserflugzüg startet und landet. Han aber au na es paar föteli chöne mache vo North Vancouver und vom Stanley Park.

Am 10 vor 7ni bini den in in Gastown acho und han gspannt druf gwartet bis die Uhr afangt dampfe und mache. Denn am Punkt 6ni het si agfange und ja den isch es scho widr fertig gsi=) (10 min gwartet und nach 10 sek. isch scho widr fertig gsi..). Ja nüt speziels aber sicher luschtig zum luege und lose.

Ufem Heimweg bini den na a es paarne luschtige Sache verbii glofe, wie zum Bispil en Hanf lade oder anere Scientology church. Aber was mi am meiste fasziniert het am heiweg isch en LP-store gsi. Aso wenn öpert na unbedingt en LP möcht keis Problem de het ez vo ABBA über Lady Gaga bis zum Hasi Hintersee.... Gar nöd gwüüst das das na git :-p

Ansuste gats mer au guet, han gnueg zum esse, has guet mit de Klassekamerade, aso chan nöd chlage. Wenn s'wetter am Samschtig guet isch, denn werdemer (6 Schwiizer und 2 Koreaner) d'Capilano Bridge in North Vancouver go beguetachte.

Aso bis pötischtens am Mäntig bis ihr de nächschti Post chönd lese. Machets guet. Schöni Grüess id schwiiz! Tschööö

Aquarium und Stanley Park

Hoi mitenand

Hüt gege de Mittag simmer is Aquarium vo Vancouver gange. Das Aquarium isch na recht gross mit verschiedene grosse, farbige "Fischlis". Nach guet 2 1/2 Stunde im Aquarium, isch es wiiter gange im Stanley Park. De Park isch mega schön und errineret mi echli an Buechberg (aso d'Waldlandschaft). S'Wetter isch im verlauf vom Tag um einiges besser worde. Am Morge hets na gregnet und ez so um die 7ni schient d'Sunä.... Typisch fürd Vancouver....

Nachemene chline bsuech bi de "totem pole" (Totenpfahl), die risig sind und d'First Nation (d'Indianer vo Kanada) het wahrschindli wuche ga um so en pfahl z'mache. Die sind recht beidruckend. Simer na d'Skyline vo Vancouver go beguetachte und go fötele...

Aso ich muss würkli sege, die Stadt isch riesig. Mir hend öbe d'Hälfti vom Stanley Park abglofe und hend sicher öbe 2 bis 2 1/2 stunde brucht...

I de nächste Wuche gits wahrschindli nöd so viil zum brichte, wills die ganzi wuche duet regnä und ich erst am Wucheend widr öbis duen unternä (Weiss aber nanig was =)).

Es grüessli us Kanada vom Spiessli =)

Vom Hockey Spiel zu Hockey Spiel

Saluti Mitenand

Ich han ja so einiges ghört das Kanadier veruckt nach Hockey sind. Aber das was mer da in Vancouver erlebt isch unvorstellbar. Wenn d'Canucks spilet, den isch niemert uf de Strass, all sind diheime oder inere Bar, egal weles Alter.

Bevor mer am Dunstigobig de Hockeymatch vo de Giants go luege sind (das sind d'Juniore vo de Canucks und spilet immoment um de Izug is Final), simer na rasch i de Downtown gsi und hend na es paar föteli gmacht.....

So es Ticket für das Spil het 22 Dollar kostet, aber das lohnt sich alle weil. S'niveau isch recht höch und nur scho die Kullise, abartig. Im Stadion sind !!7500!! Lüüt gsi und hend en Bombestimig gmacht. Nachemene hartumkämpfte Sieg hend den Giants 6:3 verlore....

Am Fritig nach de Schuel simmer kurz echli i de Downtown umespaziert, doch so gege die 4 hets afange regne und denn simer ines Pub gsesse und het gwartet bis Canucks spilet (spiel het am 7 agfange). Aber scho um die 4i ume isch das Pun guet bsetzt gsi mit viele Fans. Um so nöcher das das ganze Spiel cho isch, desto schlimmer isch das ganze worde. Schlussendlich hend Canucks mit 7:2 gwunne gege d'Los Angelos Kings.

Da s'Wetter gester und hüt nöd so guet isch, ziehnis vor hüt diheime zblibe da ich guet 1 Stund bruche bis ich i de Downtown bi...

Eventuell gangi morn Sunntig na is Aquarium vo Vancouver.

                         

                                         CU 

Hostfamily

Am 8:50 am Mittwuchmorge bini in Vancouver sicher glandet. Mit em Taxi han ich mich den zu minere Hostfamily fahre la...

Es isch es chliners Einfamiliehuus wo 3 Studente unterschlupf bütet. Nebet de Mutter Rosa, em Vater Dave, de Tochter Maggie und em Sohn Tristan lebet öbe na 5 anderi Lüüt i dem Huus (Kei Ahnig wie gross das de Keller isch?). Aber die Lüt gsetmer eh fascht nie. De einti vo de anderne zwei Stundente chunt vo Brasilie und isch na en mega flotte Typ. De anderi isch en Chines und duet eigentli gar nüt rede, de seit nedemal Hoi oder Tschau =).

Doch im grosse und ganze isch alles in Ordnig, die Hostfamily isch en mega toleranti Familie und laht üs sehr grossi Friheite...

Morn am Namitag sötts schön Wetter si und den gangi echli id Downtown und Umgebig..

Mi ghört sich scho bald wieder und na en  schöni Ziit. CU soon

Alles in Ordnig...

 

Saluti mitenand

Sitze gad am Flughafe vo Toronto und warte uf mini Maschine richtig Vancouver.....

Bis ez isch alles guet gange, hend mi mal is Land inegloh nachdem ich öpe a 10 verschiedene Lüt min Vorname, Nachname und mis Geburtstagsdatum gseit han =). So nach 22 Stunde gönn ich mir ez mal en Pause und gang öpis go esse...

Bis bald

Dario

Flug verschoben...

Air Canada AC879 Cancelled

Der nächste Anlauf nach Vancouver erfolgt am Montagabend um 18.30. Danach werde ich so um etwa 12.30 am Dienstag in Vancouver landen...

See you in Canada ;-)