Victoria

Hoi mitenand

Am Samschtig morge am 5.45 isch üse Coach nach Victoria (liet uf Vancouver Island) abgfahre. Will so früeh na kein Bus oder Zug ad Coachstation gfahre isch hemer es Hotelzimmer gmietet gad nebet de Coachstation. Den wiescho gseit isch es den am 5.45 los gange. Denn so nach ere guete viertelstund fahrt het öbis afange töne.. Nachere guete Minute het den de Busfahrer mal de Motor abgstellt und nacher heteren nöme abrocht =). Hihi
Nach dem missgschick hemer den müse 20 min warte und den isch en Ersatzbus cho. Es isch den gege de Schluss na knapp worde mit em ufd Fähre cho aber mir sind den 3 min vor das sie abfahre isch ufem Deck 2 gsi.. Namal glück ga.


Am 9.30 simmer den in Victoria acho und hend die ganz Stadt aso Städtli aglueget, aber um die Ziit isch na gar nüt glofe. Die meiste Läde und Shops hend erscht abem 10 offe. Hihi so es richtigs verschlafes Dorf.. Mir sind den zerscht "Chinatown" go aluege und sind nach dem wiiter richtig Waterfront. Nachemen chline Z'Mittag hemer en 2 Stündigi Kajak-Tour gmacht und hend am Schluss na s'Parlamentgebäude aglueget.. (Das gset huere ähnlich us wie üses Bundeshuus)...
Am obig simer den gschluchet wieder retuur mit üsem Coach...

Leider isch den de Suntig nöme eso schön gsi wie de Samschtig, es het immer wieder echli gregnet. Ich han de Tag gnüzt zum mini admistrative Sache erledige und echi z'lernä...

Ich mache mich ez na uf de Weg i mini letscht wuche a de Schuel. Nach dere Wuche hani am 15. und 16. Juni mini Prüfige und ich flüge ez definitiv am 17. Juni uf de 18. Juni nach Toronto um d'Niagara Fäll z'gse.. Bini happy

Ich wünsche eu na en gueti Ziit und bis i 2 Wuche.