Stadion, Limo and Samba

Tschau mitenand

Es isch zwar erscht Suntigmittag aber a dem Wucheend hani mal widr eso richtig viil gmacht... Phuu
Am Fritig simer echli früehner vo de Schuel gange und sind en gfüehrti Tour go mache durs Ishockeystadion vo de Canucks...
Es isch na es rechts schöns Stadion und mir hend fascht alles chöne go aluege. Agfange hets bim Best Buy club (dete kostet es Billet 10'000.- für en ganzi Saison). Det isch es aber au schön zum höckle :D. Nacher simer durs ganze Stadion glofe und hend es paar Suitene und Rüüm aglueget wo amel d'Medie und die gegnerisch Manschaft duet sitze... Leider hemer kein Iblick chöne mache i d'Kabine vo de Canucks... Hend nur en Film gse. Und die isch na recht schön :D.


Nachere guete Stund isch den die ganzi Tour wieder z'end gsi und mir hend üs uf de Heiweg gmacht und hend üs nach guet 2 Stunde wider imene guete Restaurant troffe und hend dete en guete z'Nacht gnosse. Den so gege die 20.30 isch den üsi Limo, wo mer buecht hend, go abhole cho.. Denn simer für (40.- pro Person) 2 Stunde lang dur Vancouver düset... Aso da chan mer nüt sege :D- Hihi


Nach de Limo Tour hämer na wele is Roxy (Nightclub) doch nach 45min warte (und 15m fürecho) hets mich a gschisse und ich bin mit zwei anderene es Bier go neh in es Pub....


Am Samschtig bini den grösteteils diheime gsi und han echli Sache erledigt. Doch am obig simer den is Samba gange, dass isch es Brasilianisch Restaurant und dete chamer für 32.- esse was mer nume chan.... Aso das chani nu wiiter empfehle..


Hüt gset s'Programm wiefolgt us: Wäsch mache, Lerne... (Nöd gad so suuper aber es isch ja au keis guets Wetter:D). Mi ghört sich wieder.

Gruess

Tofino

Saluti

A Pfingste hämer üs uf de Weg gmacht uf Tofino. Tofino isch uf Vancouver Island und isch es ganz es chlises Kaff... Aber wunderschön. Am Fritignamitag simer nachemene chlini Z'Mittag uf de Bus richtig Horseshoebay gfhare und dete in en Ferry gstige. Ja das isch nöd eifach es schiffli, das es isch en rechte Dampfer.... Nach guet 1 e halb Stunde fahrt simer sicher in Nanaimo acho. So gege die 5i hemer den i üsem Hotel ichecket ga und denn hämer üs uf d'suechi gmacht nachemene Restaurant. Mir hend den eis gfunde a de Waterfront und hend dete die feine Fisch gnosse. Nachemene Glace am Obig hämer üs widr retuur is Hotel bega und hend dete nachli tögelet....


Am Samschtig hemer den welle es Auto go miete, am Afang het die liäbi Verchäuferin mega schwer tue, doch wo mer ihre gseit hend das mer Vollkasko mache düend isch alles in Ordnig gsi (die spinnet mengisch total da ene..). Doch es isch doch no ganz anderscht cho. De Kolleg wo 21 gsi isch het z'wenig geld uf de Kreditkarte ga und den han ich mini geh, doch will alles uf ein Name muss sie het Sie den s'Auto uf mich umgschribe (obwohl ich nanig 21 bi..). Ich han ihre eifach gseit ich seg nöch bi 21, aber schlussendlich gsend die nurs Geld =):
Wo den das alles erledigt gsi isch, hemer üs uf Enteckigsreis richtig Tofino gmacht (isch en Fahrt quer dur die ganzi Insle wo guet 3.5 Stunde duret). De Weg nach Tofino füehrt durch Berge, Wälder, a See verbi und und und aso chan da nur sege abartig schön!! Mir hend einigi Stopps gmacht a schöni Pläzli und amene Strand, Uiiii....
Am Samschtignamitag hemer den i üsem Motel icheckt (mit Seesicht). Nachdem mer üsi Koffer echli usgrumet hend simmer tofino go aluege. Es isch nüt speziels womer über Tofino chan verzelle. Es isch es riiiiise Kaff wo amene wunderschöne Plätzli vo de Welt lit. Am erschte obig hemer nachemene guete z'Nacht de Sunneuntergang beguetachet...


Am Suntigmorge sind mer go "Whale Watching" mache. Und mir hend es schweineglück ga. Mir hend 5 Wal gse, en Seeother, e huufe Seelöwen und en Adler. Aber s'meischte isch i mim Kopf abgspeicheret. Denn en Wal gumpet hald nöd eifach so usem Wasser wenn de Spiess dete isch, sondern mi gset hald nuchli de Ruge oder mal en Flosse. Und meistens sind die Wal z'wiit eweg gsi für mini Kamera. Aber muss sege, das isch en wunderschöni erfahrig gsi. Den zu allem hene, hämer na en Insle chöne beguetachte wo nur eimal im Jahr göffnet isch. Mit wunerschönem Strand und schönem Garte.


Am Mäntig isch den nöme viil Spanends passiert, ich bin mega müäd gsi und han fascht de ganzi Rückweg gschlafe (aso nur i de ferry, han ja müsse Autofahre =)). Aber de rescht chönder da uf de Bildi luege...


Die Wuche gset leider wieder emal recht schitter us. Viil rege und und und... Ich duen mich den wieder emal melde.. Schöne

Seattle

Hallo Liäbi Leser

A dem Wucheend hämer üs mit de Schuel uf d'Reis gmacht richtig Seattle. Es sind gsamthaft 46 Lüüt us de Schwiiz, Brasilie und Dütschland gsi.. Das ganze hets aber so ufsich ga. Am Zoll (Ireis nach Amerika) hemer müse 2 Stund warte bis üse Bus entli dra cho isch.. Den hends der na 5 Frage gstellt und nachdem häsch müsse dini Fingerabdrück abgä und na schön id Kamera lächle. Den entli mit 1.5 Stund verspötig simer dem im Outlet vo Seattle acho. Aso da hets ez fascht alles gä, und das na zu super günstige Prise.. Ja das chamer sich gar nöd vorstelle wemer nöd dete gsi isch. Nachem shoppe hämer üs uf de Weg richtig Hotel gmacht. Am obig bini den mit es paar andere "Minderjährige" echli d'Stadt und d'Waterfront go aluege. Unterdesse sind die andere inere Park gsi (ähnlich Coyote Ugly)... Naja shit happens....

 Am Suntig bini den defür parat gsi, aso ja meh oder weniger und den simer uf de Spaceneedle und hend vo dete us die ganzi Stadt echli beguetachtet. Nachere guete halbstund simer den wider abe und hend üs uf de Weg gamacht richtig Downtown um no es paar sache go aluege z'ga und nachli pöstele...

Dem am 4.45 am Namitag isch es den wieder retuur gange richtig Vancouver. Und dasmal hemer am Zoll nur müsse en gueti Stund warte.. Am 9 am obig simer den wider sicher in Vancouver acho...

Die Wuche gsets s'Wätter bis ez nanig so prächtig us, und am Wucheend hani vor uf Victoria Island zga und dete na whale watching mache... Ich meld mi den wider. Gruess

Hill's Native Art & Sieg über Kanada

Hoi Mitenand
 
I de letschte Täg isch na einiges passiert da in Vancouver. Am Zischtig namitag simer rasch richtig Gastown gloffe um en Gallerie go beguetachte. Gnauer gseit "Hill's Native Art", dass isch en Gallerie mit Holzgschnizte Sache vo de First Nation (Ureinwohner vo Kanada). Das isch unglaublich wie präzis, fiin, gross das alles isch! Die ganzi Gallerie erstreckt sich über 3 Stöck und het vomene chline Marderpfahl bis zu 4m Figure alles. Aber ich denke Bilder sind besser als Wort, mi muss es gse ha...
Nachdem isch die ganzi Klass inklusive Lehrer ines Koreanisch Restuarant go esse. Leck du mir isch das guet gsi. Aber au recht spannend, denn wenn du dis Esse überchunsch, musch es due selber mitere Scheer verschnide und den öbe na 10 min warte bis das ganze fertig gchochet isch. Aber dur das ganze hemer wieder echli meh vonere andere Kultur dörfe/chöne lerne. Doch leider sind am gliche Obig Canucks (s'Hockeyteam vo Vancouver) us de entscheidig um de Stanley Cup usgschide...

Denn ich sege mal de bis ez triumphalschti Tag in Vancouver, Mittwuch 12.05.2010. D'Schwiiz besigt Kanda im Hockey. Aber am gliche obig gwünnet Montreal Canadiens (s'einzig kanadische Team wo na um de Stanley Cup spilt) gwünnt gege Pithsburg Penguins 7 spiel und hend ez nebet de Washington Capitals (s'beste Team us de Regular Season) au de letschtjährig Stanley Cup Sieger gschlage....
S'gliche Bild isch den au i de Zitig gsi, 1 bis 2 sitigi Bricht über de Triumpf vo de Canadiens und so rechts nebet dem Bricht isch in Arial 8 gschribe (nurs Resultat) das den Kanada na 1:4 verlore het gege d'Schwiiz.. Aso who cares..

Naja was solls, heimlich sinds eh am brüälle =). Aso ich mach mich ez langsam wieder uf de weg... De nöchschti Post chunt so anfangs nächscht wuche.. Ich bin das Wucheend ebe in Seattle. Tschüss